Сарапшы: Жасанды интеллект дәуірінде медианың этикасы қалыптасуы керек

Жасанды интеллектінің ақпараттық кеңістікке әсері үлкен. Осы ретте медианың этикалық нормалары мен бейбітшілік журналистикасының рөлін айқындау маңызды. Алматыда өткен халықаралық жиынға жиналған медиасарапшылар осындай пікір айтты. Мамандар жасанды интеллект дәуірінде ақпарат құралдарының жауапкершілігін күшейтіп, этикасын қалыптастыру қажет деп отыр. Сонымен қатар, шарада жалған ақпарат, эмоциялық манипуляция, әлеуметтік желідегі арандатушылық мәселелері көтерілді. Сарапшылар журналистердің жасанды интеллектіні фейк ақпаратты тез анықтау, нақтылау, мониторинг жасау, редакция жұмысын жетілдіру үшін тиімді қолдануы қажет екенін де алға тартты. Сондай-ақ бейбітшілік журналистикасы тек соғыс тақырыбымен шектелмей, қоғамдағы әлеуметтік, мәдени, этностық және гендерлік шиеленістерді диалог арқылы шешуге бағытталуы керектігін айтты.