М.Шоқайдың түпнұсқадағы фотосуреттері көрмеге қойылды

Астанадағы Ұлттық музейде Мұстафа Шоқай мен жарының түпнұсқадағы фотосуреттері көрмеге қойылды. Бұл суреттер арқылы көрнекті қоғам  қайраткерінің саяси қызметін ғана емес, жарына деген асқақ махаббат пен айнымас адалдығын көруге болады. Онда ХХ ғасырдың басындағы дүрбелең кезең, жат елде эмиграцияда жүріп бір-біріне сүйеу болған екі жанның тағдырынан сыр шертер 50-ден аса құнды жәдігер бар. Суреттердің барлығын тарихи тұлғаның жары Мария Шоқай ондаған жылдар бойы көздің қарашығындай сақтап келген. Көрме - Мұстафа Шоқайдың 135 жылдығына орай ашылды. Сондай-ақ, Мария Шоқайдың «Менің Мұстафам» атты естелік кітабының жаңартылған әрі толықтырылған нұсқасы оқырманға таныстырылды.

Әбдіжәлел Бәкір, мұстафатанушы, профессор:

Мәрия Шоқай шын мәнісінде өмір бойы атамыздың адал досы болып кетті. 23 жыл бірге тұрды, қайғырса қайғырды, қуанса қуанды. О дүниеге аттанғанда да «Менің Мұстафам» деп аттанды. Тіпті өзінің жалғыз күн көріп отырған пианиносын сатып, атамыздың басына ескерткіш орнатты.