Биыл 16,9 млн шаршы метр тұрғын үй пайдалануға берілді

Биылғы 11 айда 16,9 млн шаршы метр тұрғын үй пайдалануға берілді. Мыңдаған отбасы жаңа баспанасында қоныс тойын тойлады. Сондай-ақ ел тарихындағы ең ұзақ талқыланған заң жобаларының бірі – құрылыс кодексі екі оқылымда мақұлданып, Сенатқа жолданды. 2 мыңға жуық түзету енгізілген құжатқа сай, жаңа салынған кез келген үйдің кепілдігі 2 жылдан 10 жылға ұзарады. Бұған дейін салынған мектеп, аурухана, тұрғын үйдің кепілдігі екі-ақ жыл болған. Бес жылда құлаған мектептер, қабырғасы сөгіліп жатқан тұрғын үйлер – осы норманың салдары. Енді іргетас, қабырға, шатыр сияқты негізгі конструкциялар 10 жыл сақтандырылады. Сондай-ақ, әрбір елді мекеннің егжей-тегжейлі жоспары ашық платформада жарияланып, тұрғындар тікелей пікір қалдыра алады.