Алматы айналма теміржолында техникалық қозғалыс басталды

Алматы бекетін айналып өтетін темір жолдағы техникалық қозғалысқа рұқсат етілді. Бұл туралы Президент қабылдауында болған «Қазақстан темір жолы» компаниясының басқарма төрағасы Талғат Алдыбергенов айтты. Оның сөзінше, былтыр пайдалануға берілген Достық – Мойынты теміржолының екінші желісі арқылы 6 миллион тонна жүк жеткізілген. Жалпы тарифтік жүк айналымы 10 пайызға артты. Экспорттық тасымал 89 миллион тоннадан асқан. Жасанды интеллектіні енгізу арқылы цифрлық жобалар жүзеге асырылып жатыр. Президент теміржолшыларға арналған қолжетімді тұрғын үй салу бастамасын құптады. Сонымен қатар ірі шетелдік компаниялармен ынтымақтастықты нығайту, цифрлық шешімдерді енгізу, мультимодальдық логистиканы дамыту жөнінде тапсырма берді.