Елімізде дәрі-дәрмек өндіретін ірі 4 зауыт салынады

Қазақстанда дәрі-дәрмек өндіретін 4 зауыт салынады. Үкімет елімізде дәрі-дәрмек өндірісін локализациялауға бағытталған бірқатар ірі инвестициялық жобаны мақұлдады. Премьер-министр Олжас Бектенов тиісті қаулыларға қол қойды. Енді Денсаулық сақтау министрлігі мен тиісті компаниялар арасында келісімдер жасалмақ. Жалпы инвестиция көлемі – 173 млрд теңге. Жобалар аясында 356 дәрілік заттың өндірісі жолға қойылады. Оның ішінде әлеуметтік маңызы бар, онкологиялық аурулар, қант диабеті, вирусқа қарсы және иммунобиологиялық препараттар бар. Жаңа фармацевтикалық кәсіпорындар Алматы қаласында, Алматы және Түркістан облыстарында салынады. Нәтижесінде 675 жаңа жұмыс орны ашылады.

Жобаларды іске асыру – қазақстандық дәрілік заттар өндірісінің үлесін едәуір арттыруға, импортқа тәуелділікті азайтуға әрі халықты қолжетімді, сапалы дәрілік препараттармен қаматамасыз етуге мүмкіндік береді.