Отбасы және неке ұғымы Конституциялық деңгейде күшейтіледі

Елімізде неке мен отбасы құндылықтарын қорғау Конституциялық деңгейде күшейтіледі. Сондай-ақ адамның жеке басына қол сұқпаушылық, негізгі құқықтары мен бостандықтарын қорғау және сот билігінің тәуелсіздігі бұрынғыдан да нығая түспек. Бұл туралы Конституциялық комиссияның төртінші отырысында қаралған Ата заңға енгізілетін өзгерістер жобасында айтылды. Жоба таныстырылымы кезінде Конституциялық сот төрағасының орынбасары Бақыт Нұрмұхановтың айтуынша, ұсынылған түзетулер адам – ең жоғары құндылық деген қағидатқа негізделген. Осы бағытта азаматтардың құқықтары мен бостандықтарын қорғау тетіктері күшейтіліп, оларды іске асыру жолдары айқындалады.