Қазақстан Еуразиялық экономикалық одаққа төрағалық етуде

Биыл Қазақстан Еуразиялық экономикалық одаққа төрағалық етуде. Алғашқы отырыс Мәскеудегі одақтың штаб-пәтерінде өтті. Басым бағыттар қатарында транзиттік тасымалдарды жеңілдету бар. Жүк қозғалысына электронды бақылау жүйесін енгізу, кедендік баждарды төлеудің ортақ тәртібін қалыптастыру жоспарланып отыр. «Кедергісіз» транзит бағыты бойынша навигациялық пломбаларды кең көлемде қолданып, бірыңғай транзиттік декларацияны енгізу көзделуде. Аталған шаралар тасымалдың жылдамдығы мен құнына тікелей әсер етеді. Сонымен қатар, шекаралардан өту үдерісін жеделдетіп, тексеру санын қысқартады. Сондай-ақ кооперациялық жобаларды дамытуға айрықша көңіл бөлінбек. Қазіргі уақытта Қазақстан, Қырғызстан, Беларусь және Ресей компанияларының қатысуымен бес кооперациялық жоба мақұлданған.