Шымкент іргесіндегі Бадам өзенінде балық қырылды

Шымкенттегі Бадам өзенінде балықтың жаппай қырылуына сарқын судың төгілуі себеп болған.

Жағалау тұқы тұқымдас балықтың өлекселеріне толған. Мамандар судан сынама алып, зертханалық тексеруге жіберді. Ресми мәліметке сәйкес, өзенге жақын орналасқан мекемелердің бірінен өндірістік қалдық су құйылған.

Ермахан Қозыбаев, Шымкент қалалық экология департаментінің басшысы:

Труба тесілген енді износ дейміз, шіріген. Соның кесірінен авариялық жағдай орын алған. Судан сынама алдық. Сол шектік мөлшерден асқан әрбір ингредиентке айыппұл салатын боламыз. Заңды бұзған мекемеге қатысты жоспардан тыс тексеру жұмыстары тағайындалуда.

Бадам өзенінде 2021 жылы да балық қырылған еді. Ол кезде судың сапасы мен температура өзгерген деді мамандар. Бүгінде өзен арнасы тұрмыстық қалдыққа толған. Табиғат жанашылары жергілікті биліктен мәселені назарға алуды талап етіп отыр.