Рауан Кенжеханұлы: Жаңа Конституция – мемлекеттік тіл мәртебесін арттырады

Жаңа Конституция жобасының ерекшелігі – түпнұсқаның қазақ тілінде жазылуы. Ұлт үшін маңызды басты стратегиялық келісім  - жұрттың ойына қонымды әрі түсінікті болуы шарт. Бүгінгі жиында баяндама жасаған  «Қазақ тілі» қоғамының президенті Рауан Кенжеханұлы осылай деді.

Рауан Кенжеханұлы, «Қазақ тілі» қоғамының президенті, Конституциялық комиссия мүшесі:

Ең сапалы аударманың өзінде мағыналық реңктер жоғалады, ұғымдар ығысады. Кей жағдайда құқықтық тепе-теңдік өзгереді. Ал негізгі заң үшін бұл аса қауіпті. Себебі бір ғана сөздің қате қолданылуы конституциялық норманың мәнін өзгертіп жіберуі мүмкін. Сол сияқты құқықтық иммунитетті білдіретін “неприкосновенность” сөзінің баламасы ретінде “тиісуге болмайды” деген жалпылам тыйымды білдіретін тыйым алынған. Мағына жағынан жақын болса да, бұл тіркес құқықтық институттың атауын дәл жеткізе алмайды. Қазір құқықтық иммунитетті сипаттау үшін «қол сұқпау» ұғымы қолданылып жүр.