Қатар астанасы Дохада Қазақстанның мәдениет күндері өтуде

Қатар астанасы Дохада Қазақстанның мәдениет күндері өтіп жатыр. Елдің бай мұрасы мен құндылықтарын шетелде әйгілейтін шара қала тұрғындары мен қонақтарының қызығушылығын туғызды. Ауқымды бағдарламаның екінші күні де «Дарб Әл Саи» тарихи кешенінде өтті. Сахнада қазақстандық музыканттар ән шырқап, өнер көрсетті. Халық әндері мен заманауи шығармалар орындалды. Қазақтың қолөнер көрмелері жұртты қызықтырды. Қолөнер бұйымдары, томағалы бүркіттер, құмай тазы және қазаққа тән киім үлгілері дохалықтардың ерекше назарын аударды.

Қазақстан жайлы көбірек білу үшін осында келдік. Елдің мәдениетімен жақынырақ танысу, халқымен жүздесу біз үшін өте әсерлі болды. Дәстүрін көріп, кейбір ұқсастықтарды байқадық. Мәселен, біз де сіздер секілді саятшылық құрамыз. Бұл елді жақынырақ тануға берілген тамаша мүмкіндік деп ойлаймын.