Қазалы ауданында оқушылар экология тақырыбында пікірсайыс өткізді

Қызылорда облысы, Қазалы ауданында мектеп оқушылары арасында экология тақырыбында ерекше пікірсайыс өтті. Қоршаған ортаны қорғауға үндейтін зияткерлер додасында жастар «Таза Қазақстан» эко акциясының мән-маңызына кеңінен тоқталды.

Аудандағы Ғани Мұратбаев атындағы №17 орта мектеп оқушылары жалпұлттық жобаға айналған «Таза Қазақстан» бастамасына үн қосып, үнемі тазалық шараларына атсалысып келеді. Бұл жолы білімпаз жастар «Экологияны сақтау – заңмен бе, сана-сезімнен бе?» деген тақырыпта пікірсайысып, қоғамда экологиялық жауапкершілікті қалыптастыруға өз ұсыныстары мен ұстанымдарын жеткізді. Жалпы оқушылар туған жердің табиғатын қорғау, тазалық сақтауды ең бірінші әрбір адам өзінен бастау керек деген пайымда.