«Проблемалық кредиттер қоры» басқармасының бұрынғы төрағасы ұсталды

Ұлттық қауіпсіздік комитеті прокуратурамен бірлесіп «Проблемалық кредиттер қоры» акционерлік қоғамы басқармасының бұрынғы төрағасын ұстады. Тергеу деректеріне сүйенсек, күдікті кепілге қойылған мүлікті сатудан түскен ақшаны қорға аударудың орнына жекеменшік иесінің өзінде қалдыруға заңсыз рұқсат беріп, мемлекетке 11,4 млрд теңге көлемінде залал келтірген. Оған қоса, мемлекеттік мүлікті төмендетілген құнмен сатып, салдарынан бюджетке 1,3 млрд теңгеден аса қаражат түспей қалған.

Сондай-ақ құжаттарды қолдан жасау арқылы кепілге қойылған жер учаскелерін сатып, қорға 800 млн теңге көлемінде залал келтірген борышкер компаниялардың меншік иесі мен оның сыбайластары ұсталды. Соттың санкциясымен олар Қылмыстық кодекстің 190 және 361-баптары бойынша қамауға алынып, мүлікке тыйым салынды.