Жамбыл облысында браконьерлерге қарсы рейд күшейді

Жамбыл облысында наурыз айы басталғалы заңсыз балық аулаушыларға қарсы рейд күшейді. Шу – Талас облысаралық бассейндік балық шаруашылығы инспекциясы шектеу шарасын уылдырық шашу кезеңі басталмай жатып бастап кетті.

Өйткені бұл сол сәуірдің 15-інен бастап енгізілетін балық аулауға тыйым салу кезеңіне дайындық деп отыр. Яғни уылдырық шашатын балық саны сиремес үшін әрі су ресурстарын қорғау қажеттілігіне байланысты рейд енді жиі жүргізілмек. Қазір бұл бағыттағы жұмыс Тараз қаласы мен Жамбыл, Жуалы, Талас, Шу және Байзақ аудандарының аумақтарында күшейді. Әзірге 10-нан аса құқық бұзушылық анықталып, 9 азаматқа әкімшілік хаттама толтырылған. Ал тағы бір балықшыға тоқпен ұратын құрал қолданғаны үшін қылмыстық іс қозғалды.