Наурызнама: 4 мыңға жуық тұрғын ұлттық киіммен шеруге шықты

Атырауда бүгін 4 мыңға тарта тұрғын ұлттық киім киіп, көпшілікті тәнті етті. Қала орталығындағы Сұлтан Бейбарыс алаңында әуезді ән мен көрісуден басталған шеру Исатай-Махамбет алаңына дейін жалғасты. Алдыңғы саптағылар көк туымызды желбіретіп, өңір өнерпаздары ұлттық аспаптарда ойнап, көштің рухын көтерді. Этно-мәдени бірлестіктердің және 70-ке тарта мекеме өкілдері шараға белсене қатысып, ұлттық дәстүрді дәріптеді.

Әміржан Нұрланұлы, Атырау қаласының тұрғыны:

Қазағымыздың аспандап келе жатқан шағында бір өте керемет сезім деп ойлаймын. Оның үстіне біздің жаңа жылымыздың қазақы қарсаңында осылай бір-бірімізбен емен-жарқын көрісіп, өзіміздің ұлттық киімімізді, шапанымызды киіп, осы көшеде салтанат құрып жатқанымыз біз үшін өте жоғары әсер беруде.