Еңбек заңнамасына өзгерістер енгізілді

Сенат еңбек заңнамасын жетілдіру жөнінде заң жобасына өзгеріс енгізу туралы құжатты мақұлдады. Жұмысқа алу тәртібіне қатысты нормалар нақтыланды. Мәселен, бұдан былай тек азаматтық-құқықтық шарт жасасып жұмысқа алуға рұқсат етілмейді. Міндетті түрде жұмыс беруші мен жұмыскер арасында еңбек шарт жасалуы керек.

Руслан Рүстемов, ҚР Парламенті Сенатының депутаты:

Көп жағдайда жұмыс беруші міндетінен жалтару үшін, нақты еңбекақы көлемін белгілеуден және әлеуметтік қолдаудан бас тартып жатады. Осы норма осы олқылықты жою үшін ұсынылып отыр.  

Сондай-ақ жалғызбасты ата-аналарды жұмыстан шығаруға тыйым салынады. Жұмыс беруші жалғызбасты аналарды жұмыстан шығара алмайды деген норма бұрыннан бар. Бірақ енді «аналар» сөзі «ата-аналар» деп ауыстырылды. Яғни 14 жасқа дейінгі ұл-қызын жалғыз тәрбиелеп отырған аналардың ғана емес, әкелердің де құқығы қорғалады.