Депутат: Алаяқтар мүгедектігі бар жандарды алдауға кірісті

Алаяқтар мүгедектігі бар жандарды алдауға кірісті. Сенатор Бибігүл Жексенбай осылай деп депутаттық сауал жолдады. Депутатқа зағип ерлі-зайыпты көмек сұрап келген. Отбасы үй алмақшы болып алғашқы жарна ретінде 1 миллион теңге салған. Алайда соңында құрылыс компаниясының өкілдері қаражатты алып қашып кеткен. «Енді үй де, ақша да жоқ. Бірақ отбасы несиені төлеуге мәжбүр», - дейді депутат. Сенатор алданған ерлі-зайыптының сот орындаушыға жүгіне алмайтынын, банкке де ойындағысын жеткізе алмай отырғанын айтты. Өйткені мүгедектігі бар жандарға қызмет көрсету жайы қарастырылмаған.
Бибігүл Жексенбай, ҚР Парламенті Сенатының депутаты:

Қорғауға мұқтаж адамдар жүйеден тыс қалып жатыр. Есту және сөйлеу қабілеті бұзылған азаматтарға арналған өзара іс-қимыл мен көмектесетін балама арналармен қоса мемлекеттік және цифрлық сервистердің қолжетімділігін қамтамасыз ету керек. Сондай-ақ сот актілерін орындамағаны үшін жауапкершілікті күшейту туралы мәселені қарауды сұраймыз.