Ақтөбе облысында суға кеткен бала табылмай жатыр

Ақтөбе облысының Мәртөк ауданында он жастағы бала үш күннен бері табылмай жатыр. Іздестіру жұмыстары әзірге нәтижесіз.

Сарыжар ауылындағы мектеп оқушысы 29-ыншы наурыз күні жоғалған. Ауыл тұрғындарының айтуынша, ол өзге балалармен бірге велосипедпен өзен жағасына барып, ойнап жүрген. Сол сәтте аяғы тайып, абайсызда суға құлап кеткен. Сондықтан іздестіру жұмыстарына сүңгуірлер де шақырылды. Мамандар айналаны түгел шолып шықты. Жағалау мен ауыл айналасы да тексерілді. Іздестіру-құтқару жұмыстарына жүзге жуық адам, 30 техника, тікұшақ пен ұшқышсыз ұшу аппараттары тартылды.