Жол апатынан 616 адам жарақат алған

Бас қалада жол апаты жиілеп барады. Жыл басталғалы 500-ден аса жол-көлік оқиғасы тіркелген. Салдарынан 5 адам қаза тауып, 616 адам жарақат алған. Полиция дерегінше, ережені елемеу, жылдамдықты арттыру жайсыз жайттарды көбейткен. Күніне жүргізушілерге мыңнан аса хаттама жазылады. Десе де, қауіптің беті қайтар емес. Оның үстіне, елордада көлік нөпірі көбейген. Қазір қалада 460 мыңға жуық темір тұлпар тіркеуде тұр. Бүгін Полиция департаменті апатқа түскен көлікті артып алып, қала көшелерін аралады. Мұндағы мақсат жүргізушілердің жауапкершілігін арттыру. Сондай-ақ акция аясында жас жол инспекторлары жадынамалар мен ақпараттық материалдар таратты.

Нұрлан Қапаров, ҚПД Әкімшілік полиция басқармасы бастығының орынбасары:

Бізге жылдамдықтан гөрі адам өмірі қымбат екенін ескерген жөн. Қауіптің алдын алу мақсатында қаладағы көшелерге цифрлық камералар орнатылған. Сондай-ақ патрульдік полиция күшейтілген режиімде жұмыс істеп жатыр. Қандай да бір құқықбұзушылық анықталса, заң аясында тиісті шаралар іске асырылады.