Қорғалжын ауданында бөгет бұзылды

Ақмола облысының Қорғалжын ауданы Сабынды ауылы маңында орналасқан Шөптікөл бөгеті бұзылды. Соның салдарынан су елді мекен бағытына қарай жайылып, «Астана – Қорғалжын» республикалық маңызы бар автомобиль жолының 75-шақырым тұсын кесіп өтіп жатыр. Дегенмен, су жолдың жүру бөлігіне өткен жоқ. Қазіргі уақытта Ақмола облыстық филиалының жол қызметтері ахуалды тұрақтандыру бағытында жедел шаралар қабылдап, 14 бірлік арнайы техника мен 30-дан астам жол маманы тартылған. Үш көзді су өткізу құбыры қалыпты режимде жұмыс істеп, судың толық көлемде кедергісіз өтуін қамтамыз етіліп жатыр. Жол жамылғысы бүлінбеген, көлік қозғалысы - штаттық режимде.