Түркістан облысында павлония өсіру үрдіске айналып келеді

Түркістан облысында экологиялық ахуалды жақсарту мен жасыл аймақтарды кеңейту мақсатында павлония ағашын егу жұмыстары жүйелі түрде жүргізілуде. Әлемдегі ең жылдам өсетін «болашақ ағашы» қазіргі таңда Түркістан қаласының кіреберіс аумағында жайқалып тұр. Сонымен қатар бұл шаруа Жетісай, Келес және Сарыағаш аудандарында да қарқын алған. Жалпы, өңір бойынша павлонияның 60 мыңнан астам түбі мен ондаған гектар алқабы бар.

Айта кетейік, бұл ағаш жылдам өсіп, қолайлы жағдайда 20–25 метр биіктікке жетеді. Сондай-ақ көктем-жаз мезгілінде ұзақ уақыт гүлдеп, экологиялық тұрғыдан ауаны тазартып, көмірқышқыл газын сіңіру қабілетімен ерекшеленеді.