А.Жұбановтың 120 жылдығын Ресейде атап өтті

Ұлттық музыка ғылымының атасы, даңқты композитор Ахмет Жұбановтың 120 жылдығына орай Ақтөбе облыстық филармониясының өнерпаздары Санкт-Петербург қаласында концерт қойды. Музыка кешінде негізінен Жұбановтың шығармалары орындалды. Академиктің өнері  бұл қалада тегіннен дәріптеліп отырған жоқ. Ол Санкт-Петербург қаласындағы Глинка атындағы музыка техникумында, одан кейін Ленинград консерваториясында және Өнертану академиясының аспирантурасында оқыған.  Осынау ұшан-теңіз білімінің арқасында ғұлама ғалым қазақтың ән-күйін терең зерттеп, «Ғасырлар пернесі» , «Дала бұлбұлдары» атты кітаптарын жарыққа шығарды.

Санкт-Петербургтың қақ ортасында ауқымды шара өткіздік. Жергілікті тұрғындардың композиторға деген құрметі ерекше. Сондықтан болар, концертті тамашалауға келгендердің қарасы қалың. Одан бөлек Ахмет Жұбановтың 120 жылдығына арналған шаралар Ленинград облысы, Гатчина қаласында да жалғасын табады.