Президент БҰҰ бас хатшысының арнаулы өкілін қабылдады

Мемлекет басшысы БҰҰ Бас хатшысының Су ресурстары жөніндегі арнаулы өкілі Ретно Марсудиді қабылдады. Кездесуде су ресурстарының жаһандық және өңірлік күн тәртібіндегі негізгі мәселелері талқыланды. Президент БҰҰ аясында Халықаралық су ұйымын құру жөнінде көтерген бастамасына арнайы тоқталды. Қасым-Жомарт Тоқаевтың айтуынша, бұл қадам су мәселесіне қатысты сын-қатерлер бойынша халықаралық үйлестіру тетігін кеңейтуге серпін береді. Астанада өтетін Өңірлік экологиялық саммитте осы мәселе бойынша халықаралық консультациялардың алғашқы кезеңін бастау жоспарланып отыр. Тараптар Орталық Азиядағы тіршілік нәрін тиімді пайдалану мәселесі жөнінде де пікір алмасты.