Ыстанбұлда қазақ ғалымының еңбектері таныстырылды

Ыстанбұлда көрнекті қазақ археологы, профессор Айман Досымбаеваға арналған халықаралық ғылыми-мәдени шара өтті. Еліміздің Ыстанбұлдағы Бас консулдығы мен Түркі тарихы және мәдениеті қорының ұйымдастыруымен өткен шара аясында Жайсан мен Мерке ескерткіштерінің тарихы мен бай мұрасы таныстырылды. Ғалымдар мен тарихшылар түркі өркениетінің археологиялық мұрасын зерттеу мәселелерін талқылады. Сондай-ақ осы жиында ғалымның «Жайсан - Шу өзені түріктерінің киелі жері» атты кітабы таныстырылды. Айман Досымбаева - Жетісу мен Сарыарқа ескерткіштерін зерттеуге зор үлес қосты. 10-нан аса монография мен 100-ден астам мақала жазып, қазақ археологиясын зерттеуде терең із қалдырған ғалым.

Бұл кітапта негізінен Батыс Түрік қағанатының ғылыми мұрасы, оның ішінде тас мүсіндер, петроглифтер, ғұрыптық қоршаулар, сонымен қатар Қазақ хандығына дейінгі дәуірдегі ескерткіштер туралы топтастырылған. Бұл – енді тек қазақ халқына емес, бүкіл түркі әлеміне үлкен сыйлық, үлкен бір ғылыми мұра деп ойлаймын.

Ең маңыздысы – түркі халықтары, соның ішінде бауырлас қазақ халқымен тарихи байланыстың одан әрі нығаюы. Әсіресе студенттер, оқытушылар және ғалымдардың өзара тәжірибе алмасуы артқан сайын бұл бағыттағы қатынас, археологиялық зерттеулер жаңа кезеңге өтеді деп сенемін.