Жас ғалымдар қазақ тілін ғылым тіліне айналдырғысы келеді

Жас ғалымдар қазақ тілін ғылым тіліне айналдыруды көздейді. Олар ана тілімізде ғылыми зерттеу жүргізу дағдыларын қалыптастырып, дамытуға ерекше мән беріп отыр. Бүгін Астанада Әлихан Бөкейханның 160 жылдығына арналған «Жас ғалым» атты VIII республикалық студенттердің дәстүрлі ғылыми конференциясы өтті. Жиынға еліміздің 25 жоғары оқу орнынан 100-ден астам студент, магистрант және докторант қатысты. Қатысушылар қазақ тіл білімі, әдебиеттану, әлеуметтік-гуманитарлық, жаратылыстану, техникалық және медициналық ғылымдар бағытында ғылыми жұмыстарын таныстырды.

Біздің мақсатымыз – қазақ тілінің ғылым тілі ретінде дамуын қолдау. Сол үшін біз оқушылар мен студенттерге үлгі боларлық ғалымдарды шақырамыз. Көптеген жастар өз зерттеулерін қазақ тілінде еркін жеткізе алмайды. Осы олқылықтың орнын толтыру үшін біз қазақ тілінде ғылым туралы сөйлеуді насихаттайтын осындай конференцияларды ұйымдастырып келеміз.

Қазіргі таңда ғылыми материалдардың басым бөлігі ағылшын тілінде. Ал қазақ тіліндегі ғылыми контент әлі де жеткіліксіз. Біз осы жоба арқылы оның дамуына өз үлесімізді қоса аламыз.