«Таза Қазақстан» бастамасы Грекияда қолдау тапты

«Таза Қазақстан» экологиялық бастамасы Грекияда қолдау тапты. Еліміздің осы мемлекеттегі елшілігі игі істі ілгерілету мақсатында Афинада жағалау аумағын тазарту акциясын ұйымдастырды. Бастамаға Грекиядағы Қазақстан азаматтары, студенттер мен жергілікті тұрғындар қолдау көрсетті. Еліміздің Грекиядағы елшісі Тимур Султанғожиннің пайымынша, шара шаһарды абаттандыруға септігін тигізіп қана қоймай, бүкіл әлемде экологиялық мәдениетті дамытуға бағытталған үндеу. Афина басшылығы да акцияға қатысқандарға алғыс білдіріп, «Таза Қазақстан» бастамасы қоршаған ортаны қорғаудағы халықаралық ынтымақтастықтың маңызды үлгісі екенін атап өтті.

Николай н. Яковлев, Афинадағы Палео Фалиро Муниципалитеті мэрінің орынбасары:

«Таза Қазақстан» – бұл бәріміз ұстануға тиіс бастама. Себебі, қоқысты шашатын, проблеманы туындататын адамдардың өзі. Оны шешетін де біз. Осындай шара арқылы біз өзімізді, жас ұрпақты, балаларды тәрбиелеп, қоршаған ортаның ластануы сынды өзекті проблеманы шешу өз қолымызда екенін түсіндіреміз.