Ақтөбеде қоқыс тастағандарды ЖИ анықтап жатыр

Ақтөбеде белгіленбеген орындарға ірі көлемді қоқыс тастағандарды ақылды бейнекамералар анықтап жатыр. Жыл басталғалы 70-ке жуық құқық бұзушылық анықталды.

Облыс орталығында жасанды интеллект жүйесі орнатылған осындай 20 құрылғы күні-түні, үздіксіз жұмыс істеп тұр. Олар құрылыс қалдықтары мен ескі жиһаз секілді тұрмыстық дүниелерді шығарған тұрғындарды бірден анықтайды. Нәтижесінде, абаттандыру қағидаларын бұзу және елді мекендердің аумағын ластау деректері бойынша ондаған тұрғын әкімшілік жауапкершілікке тартылды. Дегенмен Полиция департаменті өкілдерінің айтуынша, бұл әдіс  құқық бұзушылықтарды жедел анықтап қана қоймай, олардың алдын алуға да ықпал етіп отыр.

Жанболат Ахмет, Жедел басқару орталығының бастығы:

Бейнебақылау жүйесі арқылы құқық бұзушылық тіркелген сәттен бастап ақпарат жедел өңделеді. Соның нәтижесінде құқық бұзушылардың жеке басын анықтап, дер кезінде заң аясында шара қабылдауға мүмкіндік бар. Бұл тетік қала тазалығын сақтауға және абаттандыру талаптарының орындалуын бақылауға тиімді құрал болып отыр.