Әкелер арасында волейболдан жарыс өтті

7 мамыр - Отан қорғаушы күніне орай Ақмола облысының Қараөткел ауылындағы IT мектеп-лицейінде әкелер арасында волейболдан жарыс өтті. Шараның мақсаты - әкенің бала тәрбиесіндегі маңызды рөлін көрсету, мектеп пен ата-ана арасындағы ынтымақтастықты нығайту және салауатты өмір салтын насихаттау. Жарысқа әртүрлі сыныптағы балалардың әкелерінен құралған 6 команда қатысты. Алдымен мектепте салтанатты ашылу рәсімі ұйымдастырылып, кейін қатысушылар тартысты ойынға кірісті.

Нұрсұлтан Мұратұлы, Целиноград ауданы Қараөткел IT мектеп-лицейінің директоры:

Бұл шара тек спорттық бәсеке ғана емес, сонымен қатар өскелең ұрпаққа өнегелі тәрбие береді деп сенемін. Осындай игі бастамалар алдағы уақытта да жалғасын табады деп ойлаймын. Болашақта мектеп жұмысын одан әрі дамытып, тек спорттық емес, мәдени бағыттағы іс-шараларды да арттыру жоспарда бар.