Ақмола облысы Родина ауылында жауынгерлік Даңқ музейі ашылды

Ақмола облысының Родина ауылында Даңқ музейі ашылды. Музей жәдігерлерінің басым бөлігі Екінші дүниежүзілік соғыс кезеңіне тиесілі. Онда шамамен 300-ден астам экспонат қойылған. Оның ішінде майдан даласындағы бронтехникадан бастап, теңіз және әуе кемелеріне дейін бар. Қару-жарақтың да түр-түрі кездеседі. Жалпы, Ақмола облысы соғыс жылдары еліміздің қорғанысына үлкен үлес қосқан. 60-тан астам жауынгер Кеңес Одағының батыры атанған. Мәдени нысан еліміздің Қарулы Күштерінің ұлттық әскери-патриоттық орталығына қарасты әскери-тарихи музейінің филиалы болып табылады.

Арман Әсенов, ҚР Қарулы күштері ұлттық әскери-патриоттық орталығының бастығы:

Осындай әскери-тарихи музейдің ашылуы өскелең ұрпақтың патриоттық тәрбиесі үшін маңызды қадам деп санаймын. Әскери қару-жарақты көзбен көріп, батырларымыздың ерлігін біліп өскен жастардың бойында тарихымызға деген құрмет болады. Бұл да патриотизмнің белгісі. Музей әрі қарай да әскери жәдігерлермен толығып отырады.