Роза Бағланова атындағы халықаралық вокалдық байқау өтіп жатыр

Астанада Роза Бағланова атындағы халықаралық вокалдық байқау өтіп жатыр. Оған 137 үміткер қатысуға өтініш беріп, оның ішінен 20 қатысушы іріктелді. Өнерпаздар Беларусь, Иран, Өзбекстан елдері мен Алматы, Семей, Шымкент, Орал, Павлодар қалаларынан келген. Байқаудың нәтижесі ертең белгілі болады. Жүлде қоры І орынға 2 миллион теңге, ІІ орынға 1,5 миллион теңге, ІІІ орынға 500 мың теңге беріледі. Сондай-ақ әншінің отбасы атынан жүлделі мүсінше және қазақ зергерлік серіктестігімен бірге жасалған Роза Бағланованың топтамасынан сырға табысталмақ.

Жалпы, бастап келе жатқан әнші үшін бұл байқау – үлкен сабақ. Бұл – өзіңді өзгелермен салыстыру, өзіңді өзіңмен салыстыру. Оның үстіне Роза Бағланова – Халық қаһарманы. Роза апамыз қазақ эстрада өнерінің анасы. Роза Бағланова апамыздың әндерін жастардың әрқайсысы өзінше орындайды. Қазір жас буынның талғамы жоғары.

Халық қаһарманы Роза Бағланова атындағы халықаралық байқауға қатысу – мен үшін үлкен мәртебе. Роза Бағланова апамыз қазақ өнерінің аңыз тұлғасы. Бұл кісінің өнерін, шығармашылығын мен ерекше жақсы көремін. Осындай халықаралық деңгейдегі байқауға қатысу – мен үшін үлкен тәжірибе әрі шығармашылық жолымдағы маңызды қадам.