Басты Жаңалықтар Ақтөбеліктер құстарға ұя жасады

Ақтөбеліктер құстарға ұя жасады

14.05.2026 17:27

Құстарға қамқорлық! Ақтөбеде «Таза Қазақстан» жалпыұлттық акциясы аясында ерекше шара өтті.

№8 орта мектептің оқушылары мектеп ауласында ұйымдастырылған құстар көрмесін тамашалады. Мұнда кептерлердің бірнеше түрі мен қырғауылдар әкелінген. Одан кейін ата-аналарымен бірге жасаған ұяларды ағаштарға ілді. Ұстаздардың айтуынша, алдымен қанаттылардың қай жерге көп ұшып келетіні анықталған. Яғни бұл ұялар шынымен де құстарға пана болуы тиіс.

Өмірбай Мұхамбетжанов, Ақтөбе тұрғыны:

Немереммен бірге осы ұяны салдық. Бұл, біріншіден, құстарды, жан-жануарлар әлемін қорғау. Балаға мағынасы бар. Тәрбие береді, сонымен бірге еңбекқорлыққа, ұқыптылыққа үйретеді баланы.

Мектептегі экологиялық апталық аясында оқушылар айналаны күл-қоқыстан тазартты. Сондай-ақ жер жыртып, көгал егуге дайындық жүргізіп жатыр. Бұған дейін демеушілер мен ата-аналардың қолдауымен мың түп гүл отырғызылған болатын. Аула бес бөлікке бөлініп, оның әрқайсысы әр пән оқытушыларына тапсырылған. Сәйкесінше гүлдің де бірнеше түрі өсіріледі. Оларды күтіп-баптау жұмысымен оқушылар мен ұстаздардың өздері айналысады.

Алтынай Махамбетова, оқушы:

Осы апталықты біз табиғатты қорғауға арнадық десек те болады. Әр сенбі сайын оқушылар, ата-аналар сенбілік өткізеді және осы құстардың ұясын тексеріп кетіп тұрады.

Автор

Жақсыбек Кемал

Бөлісу