Қазақстан мен Түркия халықаралық даму, ғылым және денсаулық сақтау салаларындағы ынтымақтастықты күшейтеді

Астанада Түрік Республикасының Президенті Режеп Тайип Ердоғанның Қазақстан Республикасына мемлекеттік сапары аясында «KazAID» Қазақстандық халықаралық даму агенттігінің Басқарма төрағасы Аркен Арыстанов пен Түрік ынтымақтастық және үйлестіру агенттігінің (TİKA) президенті Абдулла Ерен ресми даму көмегі саласындағы түсіністік туралы меморандумға қол қойды.

Құжат тараптардың халықаралық даму саласындағы ынтымақтастықты, соның ішінде бірлескен жобалар мен бағдарламаларды жүзеге асыруды, сондай-ақ тәжірибе мен сараптама алмасуды дамытуға деген ниетін растайды.

Ынтымақтастықтың негізгі бағыттары ретінде тұрақты даму, денсаулық сақтау және ғылым мен білім салалары айқындалды.