Университет айналасына 500 түп ағаш егілді

Еліміздегі ең жасыл қала саналатын Таразда «Tаза Қазақстан» экологиялық акциясы қарқын алды. Бұл жолы Қазақ ұлттық су шаруашылығы және ирригация университетінің ауласына 500 түп ағаш егілді.

«AMANAT» партиясының аймақтық филиалы бастаған белсенділер университет ауласы алдынан ашылған жаңа саябақты жасыл желекке айналдыруға барын салды. Мәжіліс депутаттары да жер қопсытып, жеміс ағаштарын екті. Студенттер жатақханасының айналасы да көгалдандырылды. Жалпы Таразда сәуір айында «Жасыл белдеу» жоспары бойынша 10 мың түп ағаш егілді. Енді дәл осындай көлемде көшет отырғызу күзге қарай жалғасады.

Мұқаш Ескендіров, ҚР Парламенті Мәжілісінің депутаты:

Қазір қалада мың ағаш отырғызып жатыр. Жаңа онкологиялық облыстық аурухананың қасында да ектік. Бұл елімізді көркейтуге, тазалықты сақтауға, көгалдандыруға қосып жатқан үлес. Қоршаған ортаны қорғау өзіміздің жаңа Конституция, Ата заңымызға кіргеннен кейін осындай іс-шаралар жыл бойы өтуі керек.