Оралдағы ең көне театр жаңартылды

Бүгін – Мәдениет және өнер қызметкерлерінің күні. Атаулы күнге орай Оралда 167 жылдық тарихы бар Александр Островский атындағы облыстық драма театры бір жыл жөндеуден кейін қайта ашылды. Елдегі ең көне театр ғимараты 24 жылдан бері жаңартылмаған еді. Былтыр жөндеуге жабылып, театр труппасы әртүрлі ғимаратта көшіп-қонып жүрді. Ал қазір театрдың шатыры мен іргетасы, қасбеті жаңарған. Жылу, кәріз, электр желілері ауыстырылған. Сахнаның дыбыс-жарық аппаратуралары жаңадан сатып алынған. Ғимарат тарихи-мәдени ескерткішер тізіміне енген. Атаулы күнге орай сахнада қойылымнан үзінділер көрсетіліп, әсем әуен шырқалды.

Мамыр айынан жұмысты өз ғимаратымызда бастап жатырмыз. Облыстық бюджеттен 593 млн теңге бөлінді. Түгел игерілді. Жұмыс жалпы сапалы жасалды. Соңғы 24 жылда бірінші рет өткізілген жөндеу болды бұл.