Биыл тағы 96 мектеп пайдалануға беріледі

Елімізде жыл соңына дейін 96 мектеп пайдалануға беріледі. Соңғы үш жылда білім беру нысандарының құрылыс қарқыны айтарлықтай өскені байқалады. 2020 жылдан бері 1 мың  200 мектеп салынып, нәтижесінде ел аумағында оқушы орны саны 1 миллионнан асқан. Бұл үш ауысымдық мектеп санын 4 есе қысқартуға мүмкіндік берді.  Биыл тағы 53 мың орынға шақталған 96 мектеп пайдалануға берілмек. Сонымен бірге қолданыстағы мектеп инфрақұрылымдарын жаңғырту жұмыстары жалғасуда. Жалпы 3 жылда 1 мың 300 мектепті жаңарту көзделген. Оның 820-сы ауыл мектебі. Жаңғырту бағдарламасы басталғалы бері 215 білім беру ошақтары қайта жөнделді. Яғни мектептегі сынып бөлмелері, асхана, спорт залы, инженерлі коммуникация мен қауіпсіздік жүйелері ретке келтірілді.