Алуа Нұрман Токиодағы халықаралық турнирде күміс жүлде иеленді

Қазақстандық шахматшы Алуа Нұрман Токиода өткен турнирдің алғашқы кезеңінде күміс медаль жеңіп алды. Рапид бағдарламасында өнер көрсеткен отандасымыз ширек финалда Антоанета Стефанованы, ал жартылай финалда әлемнің үздік шахматшыларының бірі Катерина Лагноны жеңді. Финалда Алуа Вайшали Рамешбабумен кездесіп, 0,5:1,5 есебімен есе жіберді. Осылайша қазақстандық спортшы беделді жарыстың күміс жүлдегері атанды.19 жастағы қазақ қызы рапид кезеңінде 8 ұпай жинап, сегіз қатысушының арасында екінші орынға тұрақтады. Қазіргі таңда ол әйелдер арасындағы FIDE рейтингінде 27-орында тұр.