Неврологиялық аурулардың ұлттық тіркелімі құрылуы мүмкін

Бастама пациенттерге диагностика, емдеу және күтім көрсету қызметтерінің қолжетімділігін арттыруға бағытталған. Бұл жайында Дүниежүзілік денсаулық сақтау ұйымы мен Денсаулық сақтау министрлігі бірлесіп өткізіп жатқан ұлттық семинарда белгілі болды. Қазақстан Дүниежүзілік денсаулық сақтау ұйымының неврологиялық аурулардың алдын алу және бақылау жөніндегі 2022-2031 жылдарға арналған жаһандық іс-қимыл жоспарын жүзеге асыруға қосылмақ. Мамандардың айтуынша, соңғы жылдары ел ішінде неврологиялық аурулардың таралу деңгейі артып келеді. Әсіресе Паркинсон дертіне шалдыққан науқастар саны көбейген. Сонымен қатар инсульт, деменция, эпилепсия, созылмалы бас аурулары мен диабеттік нейропатия неврологиялық мүгедектіктің негізгі себебі болып отыр.