Жетісу облысында көші-қон заңнамасын бұзған 382 адам анықталды

Жетісу облысында көші-қон заңнамасын бұзған 382 адам анықталды. Оның 258-і шетел азаматы. Елде заңсыз жүргендердің дені Талдықорған қаласы мен Панфилов ауданында тіркелді. Құқық бұзушылар «Заңсыз» жедел-профилактикалық іс-шарасы барысында анықталып, жауапқа тартылды. Бұдан бөлек 97 қазақстандық шетелдіктерді тіркеу және қабылдау тәртібін бұзған. Тағы 27 адам шетелдік жұмыс күшін заңсыз тартқаны үшін әкімшілік жауапкершілікке тартылды. Он бір күнге жалғасқан профилактикалық шараға 200-ге жуық полиция қызметкері жұмылдырылды. Көші-қон заңнамасын бұзғандарға қатысты материалдар сотқа жолданды.

Заңсыз жұмыс істеген 68 шетелдік азаматты Қазақстан Республикасының аумағынан тысқары шығару туралы соттың шешімі шықты. Қазір сыртқа шығарылып жатыр. Сонымен бірге Қазақстан Республикасының шекарасын қасақана заңсыз өту бойынша 2 факті анықталып, сотқа дейінгі тергеп-тексеру жұмыстары жүргізіліп жатыр.