Басты Жаңалықтар Туризм бағытындағы тұңғыш индустриалды аймақ құрылды

Туризм бағытындағы тұңғыш индустриалды аймақ құрылды

15.06.2026 17:22

Балқаш қаласында Үкімет басшысының тапсырмасымен индустриалды аймақ құрылды. 14 гектар аумаққа алдағы уақытта жаңа демалыс орындары салынады. Одан бөлек Тораңғалық және Шұбартүбек курорттық аймақтарына орталықтандырылған су құбыры тартылып жатыр.

Балқаш қаласының іргесіндегі Тораңғалық пен Шұбартүбек елді мекендерінде жағажайлар абаттандырылып жатыр. Туристердің қауіпсіздігін қамтамасыз ету үшін жарық бағаналары мен бейнебақылау камералары орнатылып, арнайы бекеттер қойылды. Дегенмен демалыс аймақтарында әлі күнге орталықтандырылған ауыз су жүйесі жоқ.

Самал Шайсұлтанова, турист:

Мында ауылдың ішінде жолды істесе, суды тартса жақсы болушы еді. Қонақ үй, сосын жағажайды дұрыстап істеп берсе дейміз.

Қазір Балқаштан Тораңғалыққа дейін магистральдық су құбыры тартылып жатыр. Жоба құны шамамен 6 миллиард теңге. Құрылыс жұмыстары үш жылға жоспарланған.

Жандос Бақытұлы, тілші:

Бұл еліміздегі туризм бағытындағы ең алғашқы индустриалдық аймақ. Көлемі 14 гектарды құрайды. Қазір мұнда бірнеше кәсіпкер өз жұмыстарын бастап кетті. Алдағы уақытта оннан аса демалыс орны салынбақ.

Индустриалды аймаққа әлі де инвестор қажет. Сондықтан кәсіпкерлерге қолайлы жағдай жасау үшін көл жағасын балдырдан тазартып, толыққанды абаттандыруда.

Жақсыкелді Иманбеков, кәсіпкер:

Жер берді, мысалы үшін индустриалды жоба деп. 4 гектар жерді білесіздер жеке адам сатып алса ол енді үлкен баға. Суын тартып беріп жатыр, тоғын тартып беріп жатыр, асфальт салып жатыр. Ол да үлкен көмек. Көлдің жағасын бізге тазалап беріп жатыр. Жұмысымыз да жеңілдеп жатыр.

Қарағанды – Балқаш автожолы жөнделгеннен кейін жол бойындағы қызмет көрсету нысандары жабылған еді. Туристер дәмхана, жанармай құю бекеттері мен жолда тынығатын орын таппай қиналады. Мәселені шешу үшін жол бойындағы инфрақұрылымды дамытуға жер телімі бөлінді.

Сапар Сатаев, Балқаш қаласының әкімі:

Бұл жерде 4 жанармай құятын автостанциялар болады, сосын екі үлкен қонақ үй болуы керек, қосымша жанында машина жөндейтін тұрақтар болады. Көлікпен адамдар шаршап келгенде демалатындай, машиналарға көлік тұрағы болады.

Былтыр Балқашқа 183 мыңға жуық турист келді. Бұл 2024 жылға қарағанда 35 пайызға көп. Әсіресе мереке және демалыс күндері жағажай лық толып, келушілер орын таппай жатады. Сол үшін жаңа демалыс орындары мен қонақ үйлер әлі де қажет.

Автор

Жандос Бақытұлы

Бөлісу