Алматыда 500-дей автобус экологиялық талапқа сай емес

Алматыда қоғамдық көліктің бір бөлігі экологиялық талаптарға мүлде сай емес. Бұл қалалық мәслихаттың кезектен тыс сессиясында белгілі болды.

Тексеріс барысында газбен жүретін 481 автобустың экологиялық нормаға сәйкес келмейтіні анықталған. Оның 85-інде катализатор мүлде орнатылмаған. Қала әкімдігі енді автобустарды талапқа сәйкестендіріп, катализаторлармен жабдықтау жұмысын жүргізбек. Дегенмен мәслихат төрағасы Мейіржан Отыншиев мәселе тек автобустармен шектелмеуі керек екенін айтты.

Мейіржан Отыншиев, қалалық мәслихат төрағасы:

Бұл тек автобустарға қатысты мәселе емес. Коммуналдық техника, мемлекеттік сатып алу арқылы жұмыс істейтін мердігер ұйымдардың көліктері, құрылыс техникалары, қаланы тазалайтын арнайы техникалар барлығы экологиялық талаптарға сай болуы қажет. Сондықтан осының бәрі толық ескерілуі керек.