Қазақстанның табиғи байлығы халық игілігі үшін сақталады

Мемлекеттің ең басты байлығы – біздің жеріміз. Конституцияда өте маңызды әрі тарихи әділдікке негізделген қағида жазылған: «Жер және оның қойнауы, су, өсімдіктер мен жануарлар дүниесі, басқа да табиғи ресурстар халыққа тиесілі». Бұл – осы ұлан-ғайыр даланың әрбір сүйемі, өзен-көлі мен қазба байлығы сіз бен біздің, яғни Қазақстан халқының ортақ меншігі деген сөз. Ал мемлекет бұл жерде «басқарушы» рөлін атқарады. Ол халық атынан меншік құқығын жүзеге асырады. Мемлекеттің міндеті – осы байлықты тиімді пайдаланып, оның игілігін әрбір азаматқа жеткізу. Жер – біздің тарихымыз бен болашағымызды біріктіретін алтын көпір. Оған иелік ету – халықтың құқығы, оны қорғау – мемлекеттің міндеті, ал оны аялау – бәріміздің борышымыз.