Алматыда сел қаупі бар көлдер тәулік бойы бақылауда

Алматыдағы сел қаупі бар мореналық көлдер тәулік бойы бақылауға алынды. Төтенше жағдай министрлігінің хабарлауынша, 130-дан астам маман сел қаупі бар учаскелерде мониторинг жүргізіп жатыр. Қазіргі гидрологиялық жағдай тұрақты. Көлдер маусымдық толу кезеңіне өткенімен, су деңгейі қауіпті межеден төмен, сел қаупінің белгілері тіркелмеген. Тау өзендеріне қосымша бақылау бекеттері қойылып, мореналық көлдер мен мұздықтарға мониторинг күшейтіліпті. Сонымен қатар Ақсай өзені алабындағы апаттық-қалпына келтіру жұмыстары аяқталды. Бүлінген жол учаскелері жөнделіп, өзен жағалауы бекітілді, дейді мамандар.