Параволейболдан Әлем чемпионатының қола жүлдегерлері елге оралды

Параволейболдан қола медаль иеленген ұлттық  құрама спортшылары елге оралды. Қытайдың Ханчжоу қаласынан шыққан ұшақ Алматы әуежайына келіп қонды. Әлем чемпионатынан алғаш рет қола жүлдесін иеленген спортшыларды әуежайдан ет жақындары сән-салтанатпен қарсы алды. Әлем чемпионатында ерлер арасында 16 ұлттық құрама бақ сынады. Ел құрамасы топтық кезеңде Бразилия, Хорватия және Ирак командаларымен ойнап, келесі кезеңге өтті. Одан кейін Польша мен Руанда құрамаларын 3:0 есебімен жеңіп, жартылай финалға шықты. Жартылай финалда Иранға жол берген қазақстандықтар үшінші орын үшін өткен кездесуде Бразилияны 3:2 есебімен ұтты.

Бауыржан Сартаев,  Параволейболдан Қазақстан ұлттық құрамасының капитаны:

Жарыстан келіп жатқанда осындай қуанышты бөлісіп, өте жоғары көңіл-күйде тамаша әсер қалдырып, сөзбен айтып жеткізе алмаймыз, керемет әсер. Жапонияда өтетін Пара Азия ойындары сол жарыста жақсы өнер көрсетіп, жүлдегерлер қатарына көтерілу негізгі мақсат.