Алакөлде катер қаққан зейнеткер екі аяғынан айырылды

Жетісу облысы Алакөл жағалауында катер қаққан 69 жастағы зейнеткер екі аяғынан айырылды. Қайғылы оқиға Көктұма ауылы маңындағы жағажайда болған. Куәгерлердің сөзінше, су көлігінің жүргізушісі зейнеткерді абайсызда басып кеткен. Науқас ауруханаға жеткізілгенде жағдайы мүшкіл еді. Дәрігерлер оған көп мөлшерде қан жоғалту және травматикалық шок диагнозын қойған. Өмірін сақтап қалу үшін шұғыл ота жасалып, екі аяғына да санның төменгі бөлігінен ампутация жасалды. Науқас дәрігерлердің тұрақты бақылауында.

Жанар Темірханқызы, облыстық ІІД ресми өкілі:

Қазіргі таңда аталған дерек бойынша қылмыстық іс қозғалып, тергеу жүргізіліп жатыр. Оқиғаның барлық мән-жайы анықталуда. Шағын су көлігі иелерін қауіпсіздік талаптарын қатаң сақтауға, ал демалушыларды судағы қауіпсіздік ережелерін бұзбауға шақырамыз.