Тоқтар Әубәкіров – 80 жаста

Жаһанды жанарына сыйғызған алғашқы қазақ. Бүгін қазақтың тұңғыш ғарышкері, Халық қаһарманы, авиация генерал-майоры Тоқтар Әубәкіров  80 жасқа толды. Мерейтой иесін Премьер-министр Олжас Бектенов Мемлекет басшысы Қасым-Жомарт Тоқаевтың атынан құттықтады. Президент құттықтау хатында қаһарманды халқы айрықша қадірлейтінін айтып, жеткен тарихи жетістіктерін тұтас ел үлгі тұтатынын жазған. Сондай-ақ игі-тілек білдірген. Салтанатты іс-шараға аэроғарыш саласының, Қарулы күштер мен Генералдар кеңесінің өкілдері, сондай-ақ отандық және шетелдік ғарышкер-ұшқыштар, сынақшы-ұшқыштар, инженерлер мен конструкторлар қатысты. Олардың бәрі Тоқтар Әубәкіровті мерейтойымен құттықтап, ізгі лебіздерін білдірді.

Айдын Айымбетов, ғарышкер, Халық қаһарманы:

Тоқтар Оңғарбайұлы жастар үшін үлгі-өнеге. Оған қарап бой түзеп, ұшқыштардың бірнеше буыны өсті, қалыптасты. Мен үшін де солай. Оның ғарышқа ұшып келуінің өзі менің өміріме тікелей әсер етті. Оның тарихи жетістігін тұтас әлем біледі.