Алматыда 20 шақырым жылу желісі жаңартылады

Алматыда «Энергетика және коммуналдық секторларды жаңғырту» ұлттық жобасы аясында 20 шақырымға жуық жылу магистралі қайта жаңартылады. Жобаны «Қазақстанның Даму Банкі» мен «Алматы электр станциялары» бірлесіп жүзеге асырады. Қазір желінің тозу деңгейі 83 пайызға жеткен. Сондықтан құбырларды толық ауыстырып, жаңа инженерлік желілер салу көзделіп отыр. Мамандардың айтуынша, жөндеу жұмыстары аяқталғаннан кейін жылыту маусымындағы апаттық жағдайлардың қаупі едәуір төмендейді. Жобаның жалпы құны 61 миллиард теңгеден асады. Жаңарту жұмыстарын 2030 жылдың соңына дейін аяқтау жоспарланған.