ІІМ дипфейк пен жалған брокерлерден сақ болуға шақырады

Соңғы уақытта ел аумағында түрлі жобаларға инвестиция салу және ақша енгізу сылтауымен жасалатын интернет-алаяқтық фактілері жиілеп барады. Қаскөйлер мессенджерлер мен әлеуметтік желілерде дипфейк, яғни танымал тұлғалардың бейнелерін қолдану арқылы азаматтарды түрлі инвестициялық жобалар мен қорларға қаражат салуға үгіттейді. Осылайша, олар азаматтарға жылдам әрі кепілдендірілген табыс табуға уәде береді. Жалған брокерлермен байланысқа шыққан кезде қаскөйлер мобильді қосымшаларды орнатуды, сілтемелерге өтуді немесе ақшаны «инвестиция», «аккаунтты тіркеу» не «табысты ұлғайту» деген желеумен үшінші тұлғалардың шоттарына аударуды ұсынады. Әдетте, ақша аударылғаннан кейін жалған брокерлермен байланыс үзіліп, уәде етілген табыс түспейді. Киберқылмысқа қарсы күрес мамандары азаматтарға күмәнді инвестициялық ұсыныстарға сенбеуге кеңес береді және белгісіз адамдарға, күмәнді шоттарға ақша аудармауға шақырады.