ШҚО-да қайтарылған қаржыға әлеуметтік нысандар салынды

Шығыс Қазақстан облысында мемлекетке қайтарылған қаражат есебінен әлеуметтік маңызы бар жеті нысанның құрылысы аяқталды. Олардың барлығы шалғай ауылдар мен халық көп шоғырланған аудан орталықтарында бой көтерді. Риддер қаласындағы көпбейінді аурухана кешені жаңартылса, Алтай ауданында магниттік-резонанстық томография аппаратын қоюға арналған қосымша ғимарат салынды. Ал Шемонайха ауданындағы алыс ауылдардың бірінде дәрігерлік амбулатория пайдалануға берілді. Бозанбай, Асубұлақ, Отрадное және Большая Речка ауылдарындағы сумен жабдықтау нысандары толық жаңартылды. Нәтижесінде 4 мыңға жуық тұрғын таза суға қол жеткізді.