Шығыстағы орманшылар бес жылда 40 млн көшет екті

Еліміздегі жалпы орман қорының төрттен үш бөлігі шығыста өседі. Оның 80 пайызы – қылқан жапырақты ағаштар. Осы ен байлықты одан әрі сақтап, күтіп-баптап, қорын көбейту үшін Мемлекет басшысы Үкіметке 2021 жылдан бастап 2027 жылға дейін ел көлемінде 2 миллиард ағаш егуді міндеттеген. Игі бастаманы шығыстағы орманшылар бірінші болып қолға алып, соңғы 5 жылда 40 миллион көшет екті. Өңірде қазір 13 орман шаруашылығы, 2 қорық, 1 ұлттық парк бар. Аймақтағы 3 миллион гектар орманға 1200 орманшы жауапты.

Дамир Ерназар, облыстық Табиғи ресурстар және табиғатты пайдалану басқармасының бас маманы:

Орманда көшет егумен қатар мемлекеттік орман күзеті қызметкерлері тұрақты түрде рейдтік жұмыстар атқарып тұрады. Осы уақытқа дейін орманда заң бұзушылық және басқа да жағдайлардың алдын алу бойынша 1100-ден астам рейдтік іс-шара жүргізілді.