Басты Жаңалықтар Жетісу облысына 120 дәрігер қажет

Жетісу облысына 120 дәрігер қажет

21.08.2026 13:20

Жетісу облысы бойынша 120 дәрігер қажет. Әсіресе хирургтар, акушер-гинекологтар мен жалпы тәжірибелік дәрігерлерге сұраныс жоғары. Мамандардың аздығынан аймақтағы ауруханаларда бірқатар жұмыс орындары бос тұр. Мәселені шешу үшін биыл облыстық бюджеттен резидентурада 151 маман даярлауға 488 млн теңге бөлінді.

Ерік Нұрланбаев, қалалық көпсалалы аурухана директорының орынбасары:

Жас мамандардың кәсіби дамуына ерекше көңіл бөлеміз. Біліктілігін арттыруға, республикалық орталықтарда тәжірибе жинауға, шеберлік сабағына қатысуға және технология меңгеруге мүмкіндік береміз.

Өңірде дәрігерлердің тұрақтап қалуы үшін әлеуметтік қолдау мәселесі қолға алынған. Биыл 15 медицина қызметкері баспанамен қамтылса, 20 маман біржолғы көтерме жәрдемақы алды. Ал, «Дипломмен ауылға» жобасы аясында 155 маман шақырылыпты. Оның 59-ы ауылдарға аттанса, 96-сы қалаларға жұмысқа орналасқан. Дипломмен келген жастарға әлеуметтік тұрғыда жағдай жасалып жатыр.

Ермек Мизамбаев, облыстық жұмыспен қамтуды үйлестіру және әлеуметтік бағдарламалар басқармасының басшысы:

155 маманға 52 млн тг көлемінде көтерме жәрдемақы берілді. Тұрғын үймен қамтамасыз ету немесе салып алу үшін 2000 АЕК – 2500 АЕК төлемдер беріледі. Яғни бұл 10 млн теңгеге дейінгі әлеуметтік қолдау шаралары.

Автор

Нұрдаулет Сыздық

Бөлісу