QR-төлемдер карта арқылы төлеуді басып озды

Қазақстанда QR-төлемдер картамен POS-терминалдар арқылы жасалатын төлемдерінен озып кетті. Ұлттық банктің дерегінше, жарты жылдың ішінде қолма-қол ақшасыз операциялардың саны 7,1 миллиардқа жетті. Транзакциялардың жалпы құны 92,1 триллион теңге. QR-төлемдер POS-терминалдардағы карта төлемдерінен операция саны бойынша 38%-ға жоғары болды. Ал қолма-қол ақшаға сұраныс төмендеді. Ақша шешіп алу операцияларының саны 5,8%-ға азайды. Шілдеде іске қосылған банкаралық ортақ QR жүйесі алғашқы айында 8 миллионнан астам операцияны өңдеді.